पुणे : पुण्यातील ज्येष्ठ जादूगार चंद्रशेखर चौधरी यांच्या पंच्याहत्तरीनिमित्त २१ ऑक्टोबर रोजी ७५ जादूगारांच्या हस्ते त्यांचा सत्कार केला जाणार आहे. हे सर्व जादूगार या वेळी आपल्या जादूचा आविष्कार दाखवणार आहेत. यामध्ये परदेशातील चार जादूगारांचा समावेश आहे.
‘सोसायटी ऑफ इंडियन मॅजिशियन्स’ या संस्थेने या जीवनगौरव सोहळ्यासाठी पुढाकार घेतला आहे. हा सोहळा पुण्यातील पीवायसी जिमखान्यात २१ ऑक्टोबर रोजी सायंकाळी सहा वाजता होणार आहे. पीवायसी जिमखान्याच्या सहकार्याने होणाऱ्या या कार्यक्रमाला जिमखाना सदस्य उपस्थित राहणार आहेत. ‘सोसायटी ऑफ इंडियन मॅजिशियन्स’चे अध्यक्ष भूपेश दवे (मुंबई) यांच्या हस्ते चंद्रशेखर चौधरी यांचा सत्कार करण्यात येणार आहे.
१९६१ साली पुण्यात जादूचा पहिला प्रयोग करणाऱ्या चंद्रशेखर चौधरी यांनी देशभरात, देशाबाहेर हजारो प्रयोग केले. बल्ब निर्मिती करणारे उद्योजक असतानाही चौधरी यांनी जादूगार म्हणूनही यशस्वी कारकीर्द केली. इंटरनॅशनल मॅजिक स्टार, लाइफटाइम अचिव्हमेंट अॅवॉर्ड असे अनेक पुरस्कार त्यांना मिळाले आहेत. पुण्यातील मॅजिशियन्स असोसिएशन या संस्थेच्या स्थापनेत त्यांचा सहभाग होता. जादूगारांची पुण्यात अधिवेशने आयोजित करण्यात त्यांनी पुढाकार घेतला होता. त्यांच्या या क्षेत्रातील योगदानाचा सन्मान २१ रोजी केला जाणार आहे.
